اشعار ابوذیات عراقیه
اويه هل ماخذ دليلي اوياك عيده
الگلب مو بس بعد رمضان عيده
عندي العيد من نگعد سويه
***اشعار عراقیه***
مرارتنه يصاحب مرها منكم
وانه المعلول وابحث مرهم الكم
تدري ليش آنه مرهم الكم
آنه ارهم لابو اطباع الوفية
***اشعار عراقیه***
هاك اشعل گلب گلبي وجهاك
اعله حالة راح اعلمنك وجهاك
بشالك من تلف شعرك وجهاك
تلف روحي مثل لف المنيه
***اشعار عراقیه***
كلمن گال سوف اعمل وسبني
چنه بحچيه شتمني وسبني
أگله من الوطن إطلع وسبني
آنه ابني الوطن بثنين اديه
***اشعار عراقیه***
طبع اليحفر بصحراء يعراﮒ
ومن طبع الشجر بالطين يعراﮒ
ومن طبع العراقي ايصيح يعراﮒ
إلك يغدي العمر فدوة وهدية
***اشعار عراقیه***
أشد حبل الوصل والگاه محتال
بسبب لن التريده الروح محتال
سكن گلبي ورضيت ايكون محتال
وجبتله الكرسي ريسته عليه
***اشعار عراقیه***
يظل غامض سؤالي اوياك منحال
وجسمي من السهر وياك منحال
وحياتك صرت يبن الناس منحال
العسل حصتك وانه اللسعات بيه
***اشعار عراقیه***
يحلوة الطول من تمشين بالراح
بمشيتچ مو طحنتي الگلب بالراح
تعذبت وصفگت الراح بالراح
وراحت روحي من مريتي بيه
***اشعار عراقیه***
علي دنياي صبت غيض چزيت
وروحي من القهر والضيم جزيت
عشرتك والإسم فد نوب چزيت
السبب مديت إيدي وعطت بيه
***اشعار عراقیه***
تعال اگعد نصفي الإلك ولي
عليه انوب ياهي تريد ولي
گتله خل ابوسك گال ولي
شنهي تبوسني وتنگ عليه
***اشعار عراقیه***
شفكن من هواكم بعد شفتك
وعلي طفر عسل من حچت شفتك
طحت كلي اعله كلي بيوم شفتك
دگضني مو طحت كلي عليه
***اشعار عراقیه***
عليل ومن بست شفتك شفتني
ولتگلي العشگ فتك شفتني
اذا كلك طحت لمن شفتني
أنه اتوذر إذا تخطف عليه
***اشعار عراقیه***
مريض آنه وصعد مرضي على اشفاي
وطب لندن فلا يلحگ على اشفاي
حبيبي من تحط شفتك على اشفاي
أطيب وكل مرض مايضل بيه
***اشعار عراقیه***
صرت كلي جرح بجفاك ودي
وشوفك كل مسه ومصباح ودي
إذا خلص رصيدك علي ودي
أمد شريان وانته اتصل بيه
***اشعار عراقیه***
جمال وچان عندك كله فتنه
واجب رغم حچيك كله فتنه
تدري اشگد فرگتك كلفتنه
مثل الراح دفان بأخيه
***اشعار عراقیه***
هله ياللي عشرتي اوياك_مأسات
إلك خدين بيض أتگول ماسات
أسكر لو شفاي شفاك ماسات
واذوب ومايظل كل حيل بيه
***اشعار عراقیه***
وحگ الألف والآمين والها
ابعدها ماتسله الگلب ولها
الشمس صارت مناصف إلي والها
بخدها النور وآنه النار بيه
***اشعار عراقیه***
يون بسمك دليلي انته وانته
تاه وأرد اسألك انته وانته
يحب اثنين غيرك انته وانته
تركني وإنته بس ضليت بيه
***اشعار عراقیه***
زرعت الدرب لجلك وردة وردة
وعذب منهل ودادك وارد اوردة
مثل يعقوب حالي ورده ورده
لاردلي القميص ولاله جيه
***اشعار عراقیه***
ببعادك صفيت اشبه خرابة
واحس بيتي علي وحشة خرابة
يوم اليگظي من دونك خرة بيه
الموت اهون ولابعدك عليه
***اشعار عراقیه***
من زغري الحزن والضيم چلباي
ويروحي بحبل صبرﭺ حيل چلباي
أكل عظمي او وفه وياي چلباي
وبعضهم أكل لحمي وخان بيه
***اشعار عراقیه***
وحگ من ذا الذي أسرى ولعراج
على الشينات ماردن ولا اعراج
العتب مو على الما يمشي والعراج
العتب على الصاحي ميسويله جيه
***اشعار عراقیه***
طحت مابيه حيل اعدل ولا اعوج
ودليلي ابنار لهابة ولع وج
اتشمت بيه الصاحي والاعوج
وغمان الوكت سولفوا بيه
***اشعار عراقیه***
حبيبي بيا بخت وياي شديت
وگلي بهجرك شقدمت شديت
إصبعك حتى تذكر خيط شديت
انحصر دمك ولافكرت بيه
***اشعار عراقیه***
بعد شتأمن من الخان شرجاي
وعلي غير شمالك صار شرجاي
أعرفك من تجيني اوياك شر جاي
وتطش يمي المصايب واهليه
***اشعار عراقیه***
انياب الدهر عضن من شراها
وبالله ارجوك كفني من شراها
صحت للبيع روحي من شراها
شراها الچان يحلملي بأذيه
***اشعار عراقیه***
تبلل ثوب حزني ما شريته
مشه وريته اعله گلبي ماشي ريته
حل بية الشراني ماشريته
شريت الباعني ومارحم بيه
***اشعار عراقیه***
احلفت ماأبچي بفراگك ولانوح
وبعد ما ردد بإسمك ولانوح
يوسف مبتله مثلي ولانوح
ولايعقوب مر مثلي بأذيه
***اشعار عراقیه***
أعلن ياگلب حبك وشيعه
واتبع راي كل مخلص وشيعه
عيب حچاية السنة وشيعة
الوطن لاهل الوطن كلهم سويه
***اشعار عراقیه***
آخ اشگد احبنكم واجلكم
وگلبي انشلع من صدري واجلكم
أنه اتمنه يحين اجلي وأجلكم
بگبر واحد يدفنونه سويه
***اشعار عراقیه***
جفيت وخلفت بجفاك عبرات
ونيني وصل سابع جار عبرات
أنه الشاطر عليه اشلون عبرات
مشه وماچلبت بثنين اديه
***اشعار عراقیه***
شجاك شبيك لامريت لايت
وهاي الروح عگبك حيل لايت
يبو عيون الوسيعة تگول لايت
ضرير آنه دحط عينك عليه
***اشعار عراقیه***
ونيني لاسنة بطل ولاعام
وسجني خاص الي وحدي ولاعام
أخبرك لا أخو ينفع ولاعم
بس الله العزيز يحن عليه
***اشعار عراقیه***
صفت شمس الضحه بالعين ظلماي
حزين ولا بقه بالعين ظلماي
أنه المظلوم محد عرف ظلماي
جفوني العشت وياهم سويه
***اشعار عراقیه***
حرت مابين أتاني ماأتاني
وعدد شماتي يمكن ماأتاني
انتظرته هواي تالي ماأتاني
ماريده بعد لو حب اديه
***اشعار عراقیه***
أون ومن ونيني اعضاي خوان
شجاني وماعرفت الوكت خوان
حسافة الچنت اعدهم إلي خوان
صفوا عدوان بعد الصار بيه
***اشعار عراقیه***
الدهر بس البراسه اجنون يمنه
غدر بيه وبجاري الچان يمنه
ماتنتصر يسرة بغير يمنة
ولا يمنه وحدها اتحل قضية
***اشعار عراقیه***
الدهر أغضب عليه ودار وجها
وبنيرانه چوه احشاي وجها
صديقك لو زلف عالعدل وجها
مو بالعكس تحفرله ابهبيه
***اشعار عراقیه***
جره دمعي على الوجنات ياحيف
على اللي مايقدر التعب ياحيف
آنه الچنت اخوف خفت ياحيف
ولذت بالچانوا يلوذون بيه
***اشعار عراقیه***
حنيني اعليك أمك ماتحنه
وظهري لغير شخصك ماتحنه
أسف چفي بمحبتك ماتحنه
تحنه دموم من گلبي الخطيه
***اشعار عراقیه***
لاتأشر على الماشي ولتصح
وخوة صدﮒ ماظلت ولتصح
اعضامي أبد ماتبره ولتصح
أصحه لو يمر ذكرك عليه
***اشعار عراقیه***
عيني من الزغر دمعي نغمها
وروحي ما بعد يطرب نغمها
الدنيا اخلاف عشرتكم نغمها
مثل موته انتمشه اعله الوطيه
***اشعار عراقیه***
علي مرت يناهي ايام سودة
واريد اصبغ اهدومي اعليك سودة
حبك بالگلب والروح سوده
أونن والطبيب احتار بيه
***اشعار عراقیه***
كل من شاف حالي أبد مالام
وعرفني وشاف جرحي كلف مالام
صرت مثل الطفل بالمهد مالام
يتيم وعيشته كلش رديه
***اشعار عراقیه***
يهل ناوي على الهجران وك تان
خامك لاتخبطه بصوف وكتان
بالدنية يمر عالبشر وكتان
وكت راحة اوكت كله أذيه
***اشعار عراقیه***
يلايم لا تلوم الگلب بسعاد
صدﮒ ناس بضليمة وناس بسعاد
يهل گاعد توالي الليل بسعاد
تذكرني بوليفي الخان بيه
***اشعار عراقیه***
هلال افراگم روحي وهلها
ودمعتي مرة أكفكفها وهلها
البصرة وكل نواحيها واهلها
الوجودك فرحت وأدت تحيه
***اشعار عراقیه***
عذاب الشوﮒ شبگ ساعديني
وساعة انخه الأيمة ساعة ديني
على نص المصايب ساعديني
كلف ظيم العشگ كله عليه
***اشعار عراقیه***
وحگ صفين والخندق وحطين
أملش الراس بغيابك وحط طين
واطير من الفرح صدﮒ وحطين
إذا بالطيف مرة اتمر عليه
***اشعار عراقیه***
أخوي اللي ردت وياه نبله
رماني وشج الي بحشاي نبلة
إذا إحنه امن اهلنه النوب نبله
اشتظن نرجه الغريب اعله الحمية
***اشعار عراقیه***
العگل تكين تك انجن وشل تك
بسبب داريتك بزغرك وشلتك
عصرتك عصر بچفوفي وشلتك
لگيتك بس عذاب ونوح اليه
***اشعار عراقیه***
بچيت وبالدمع للعين صفيت
اخبطوا ياما اخبطو واشكثر صفيت
يصاحب ويه دهري اشبيك صفيت
انطبگتوا اثنينكم عدوان اليه
***اشعار عراقیه***
آنه الماعرفت اولك من اتلاك
وياهو البالحسن گبلك من اتلاك
يعشعش وهم بعيوني من اتلاك
كتاب وصعب تفسيره عليه
***اشعار عراقیه***
بصحن شوگك يروحي دوم نطفه
ولا من نار حبك يوم نطفه
أحبك ياترف من چنت نطفة
وكاروكك بتوتي وذني ادية
***اشعار عراقیه***
أشوف العمر لايسوه بلاهم
ولو منهم علي زايد بلاهم
وينه المسعد وعايش بلا هم
واسأله اعله الفرح ميمر عليه
***اشعار عراقیه***
الحزن ماينحسب لو ردت عده
على المبعد واخذها الروح عده
يعمري اللي على العشرين عده
ظلمة وهالليالي تمر خفيه
***اشعار عراقیه***
حبيبي لاتظن الدهر سرنه
هجرنه ديارنه وللغرب سرنه
وحياتك ماظهر للغير سرنه
بس دمعي فضحني وعم عليه
***اشعار عراقیه***
شمالك بيه مافد يوم حسيت
واحس جرحك بماي العين حسيت
تدري بيوم عني ارحلت حسيت
العمر وي روحتك راح من اديه
***اشعار عراقیه***
شجاها عليك خلانك وربعاك
كلهم كلو من طيبك وربعاك
ثلث ترباعك انته الهم وربعاك
حمه للگاصدك يشكي الأذيه
***اشعار عراقیه***
طفل گلبي بغيابك ماله والي
غده الشيب اعله راسي ماله والي
عضو من اعضاي وكتي ما لوالي
لچن ضيمك لواني وعم عليه
***اشعار عراقیه***
جفوني اغطاك وعيوني وسدلك
أبيع سنيني يالغالي وسدلك
أصيرن فيض عالشامت واسدلك
واصد اسهام عذالك بديه
***اشعار عراقیه***
وحگ الفوﮒ ماتت راس ابيها
يظل حبك بروحي راسي بيها
بعشرتك إذا گطعوا راسي بيها
ولا أتخله عنك للمنيه
***اشعار عراقیه***
يأن الگلب وتأثر بما أن
واظن الروح ماتطفه بماءا
طحت گدامك وگتلي بما أن
طلبت العون مني اتبوس اديه
***اشعار عراقیه***
عدت ياما وبعد كافي شعدلك
واعوج صعب تعديلك شعدلك
خمسة خمسطعش عشرة شعدلك
جزن مليون دگاتك اليه
***اشعار عراقیه***
أنه الما كرر بحچيي ولاعيد
ولا أحسب بزلاتك لاعيد
شمالك ماتمر بيه لاعيد
الخلل مدري بجنابك مدري بيه
***اشعار عراقیه***