أجلبنك يليلي وروحي مسحونه
حَظِر تجوال عدنا بسبب كورونه

صارت بينا خوفه والله مامعقول
البوسه والمطالس ، صار مامقبول
گمنا نخاف من أبنآدم ٠٠ المنشول
ونشرد لو سمعنا مسخن سخونه

اليعطس واليكِح مكروه بين الناس
محد يوصله ولاينكض ٠ وينجاس
هاي شلون بلوه وشاب منها الراس
كلمن ينتشل گاموا ٠٠٠٠٠٠ يحجرونه

يحجرونه ويظل معزول وينادي
 وين أهلي وأخوتي ومرتي وولادي
صرِت مكروه كلها تصيح  ليغادي
ولا واحد يگول شلونه ٠٠ مالونه

سدوها الشوارع ماكو رايح ، جاي
حسره عليك من تطلع تجيب الماي
لاظل فكر عدنا وتاه منا ٠٠٠ الراي
الحَظُر گلي شوكت خايب يفتحونه

حظر تجوال عدنا وكلمن ٠٠ أبّيته
صارت عَفرته عدنا و صِفَت٠٠ هيته
ماندري الحظر لشوكت ٠٠٠٠ تاليته  
ونطلع من سِجنّا البيه ٠٠ سِجنوُنه

حظر تجوال عدنا وباگو ٠ الحصّه
بس نفرك بدينا ونغُم  ٠٠٠ بالگصّه
يالمسؤول كون انلزمك ٠٠٠٠ بعَصّه
ونزيِّن شيب أبوك ونشلع  سنونه

مناگَر والطلايب صارت ٠٠٠٠ بكثره
غم هاي الحياة وعيشة٠٠٠ الگشره
واحدنا بعد ماينحمل ٠٠٠٠٠ صبره
بالمطبخ بقينا نغسل٠٠٠٠ اصحونه

نغسل بالصحونه ونايمه أم كفشه
و أخدر چاي أگعد گُمِت من غبشه
گمت أطبخ الباچه و أغسل الكرشه
و أصبَّن بالغدا وتاكل ٠٠٠ الخاتونه

مثل ذيچ الزلم هيهات ٠٠٠٠ ماتلگه
محزَّم بالرصاص ولازم ٠٠٠ التفگه
ألف ياحيف هسه يطبخ ٠٠٠ بمرگه
يگشِّر بالبصل وتدمع ٠٠٠٠٠٠اعيونه

مكيفه بالحظر نسوانّا ٠٠٠٠ إمسعده
ليل انهار تدعي أتطوِّل ٠٠٠٠٠ المُدّه
أظل گاعد ابّيتي وبابنا٠٠٠ انسده
ولا واحد يطبنا وينخطف٠٠ لونه

شوكت نطلع يخوتي ونترك النسوان
وترد ذيچ السوالف گعدة٠٠ الديوان
ومجالسنا ترد ونسيِّر ٠٠٠٠٠ برمضان
ونقره أعلى الغريب الحمَّل٠٠ اضعونه

نقره أعلى الغريب وحاضر٠٠٠ الشدّه
معقوله يحيدر بابك ٠٠٠٠٠٠٠٠ اتسدّه
مشتاقين الك مو طالت ٠٠٠٠٠المدّه
تدري الروح بيك أصبحت  مجنونه

يبو الحسنين تحضرنا يحامي الجار
نِحَلفَك بالبتول وبالنَّبي ٠٠٠٠ المختار
يخلص هالوباء ونعتني ٠٠٠٠٠٠ زوّار  
ومانقبل علي بابك ٠٠٠٠٠٠٠ يسدونه

ملهوفين نوصل حضرتك و انطوف
نفوت أعلى المنايا و مانهاب الخوف
عنَّك مانرد لو نزحف أحنا زحوف
مجنونين بيك أعداك ٠٠٠٠ سمّونه

أجلبنك يليلي وروحي مسحونه
حظر تجوال عدنا بسبب كوُرونه

((  ستار الحچامي  ))